Нұрай ісі бойынша тың дерек шықты: айыпталушы 35 рет пышақ жарақатын салған
Шымкентте Нұрай Серікбайдың өліміне қатысты іс бойынша сот отырысы басталды. Айыпталушы 35 рет пышақ жарақатын салған, сот тікелей эфирден бас тартты.
Сурет: dalanews.kz
Шымкентте 21 жастағы Нұрай Серікбайдың өліміне қатысты іс сотта қарала бастады. Тергеу дерегінше, айыпталушы құрбанға 35 рет пышақ сұққан, деп хабарлайды Qazaqtoday.info сайты.
Судья айыпталушы Шерхан Аймаханнан жеке басы туралы мәліметтерді сұрады. Ол 33 жаста, Шымкентте туған, энергетика саласында жоғары білімі бар екенін, үйленбегенін және бұрын сотталмағанын айтты.
Жәбірленуші тараптың адвокаттары сот процесін тікелей эфирде көрсетуді өтінді. Олардың пікірінше, іс қоғамда үлкен резонанс тудырғандықтан, ашықтық қажет. Адвокаттар трансляция қудалау мен сталкингтің салдарын көрсетіп, басқа әйелдерге құқықтарын қорғауға көмектеседі деп есептейді. Алайда айыпталушының қорғаушылары тікелей эфирге қарсы болды. Судья жәбірленуші тараптың өтінішін қанағаттандырмады.
Шерхан Аймахан соттың алқабилер қатысуымен өтуіне қарсы екенін мәлімдеді. Осыдан кейін мемлекеттік айыптаушы айыптау актісін оқыды. Тергеу нұсқасы бойынша, айыпталушы алдымен бес рет пышақ жарақатын салып, кетіп қалған, бірақ кейін қайта оралып, тағы 30 рет пышақ сұққан. Барлығы 35 рет пышақ жарақаты салынғаны көрсетілген.
