Қазақстанда мемлекеттік қызметшілердің 56%-ы әйелдер — ЕҚЫҰ сессиясында айтылды

Сурет: turkystan.kz

Қазақстанда мемлекеттік қызметшілердің 56 пайызын әйелдер құрайды, ал судьялар құрамында олардың үлесі жартысынан асып түседі. Бұл туралы Варшавада өткен ЕҚЫҰ-ның Адами өлшем жөніндегі конференциясының сессиясында заңгер әрі гендерлік саясат пен адам құқықтары жөніндегі сарапшы Айгерім Құсайынқызы мәлімдеді.

Бұл туралы Qazaqtoday.info сайты хабарлайды.

Сарапшының айтуынша, Қазақстан гендерлік теңдікті адам құқықтарын қорғаудың ажырамас бөлігі және мемлекеттің тұрақты дамуының негізі санайды. Елде осы салада берік нормативтік-құқықтық база қалыптасқан. Гендерлік саясаттың негізгі бағыттары 2030 жылға дейінгі отбасылық және гендерлік саясат тұжырымдамасында бекітілген.

Қазақстан БҰҰ-ның Әйелдерге қатысты кемсітушіліктің барлық нысандарын жою туралы конвенциясына қатысушы мемлекет. 2009 жылдан бастап елде тең құқықтар мен мүмкіндіктерді қамтамасыз ететін заңнамалық кепілдіктер қолданылып келеді.

Жетістіктер халықаралық рейтингтерде де көрініс тапқан. Дүниежүзілік банктің Women, Business and the Law 2024 зерттеуінде Қазақстан әйелдердің экономикалық мүмкіндіктерін қамтамасыз ететін заңнамалық жағдайлар көрсеткіші бойынша 100 балдың 75,6 балын жинаған. Сонымен қатар ЭЫДҰ жанындағы орталық Қазақстанды кемсітушілік деңгейі төмен елдер тобына жатқызады.

Айгерім Құсайынқызы әйелдердің қоғамдық-саяси саладағы өкілдігіне де тоқталды. Партиялық тізімдерде әйелдерге, жастарға және мүгедектігі бар адамдарға арналған 30 пайыздық квота заң жүзінде бекітілген. Соңғы сайлау қорытындысы бойынша Құрылтай депутаттарының арасында әйелдердің үлесі шамамен 34 пайызды құрады.

Басқару саласындағы әлеуетті дамыту үшін елде ауқымды білім беру жобалары жүзеге асырылып келеді. Атап айтқанда, «Томирис» жобасы аясында 1 600-ден астам әйел көшбасшылық бойынша арнайы даярлықтан өткен. Ал БҰҰ-Әйелдер құрылымымен бірлескен бастама шамамен 600 қатысушыны қамтыған.

Сөз барысында сарапшы мемлекет тарапынан әйелдер мен балалардың құқықтарын қорғау бағытында қабылданған шараларды да таныстырды.

Реформалар аясында ұрып-соғу мен денсаулыққа қасақана жеңіл зиян келтіру қылмыстық жауапкершілікке жатқызылды. Сондай-ақ аңду және некеге тұруға мәжбүрлеу үшін жауапкершілік енгізілді. Бұрынғы арызға негізделген тәсілдің орнына құқық бұзушылықтарды анықтау тәртібі енгізіліп, уәкілетті органдарға жәбірленушінің алдын ала өтінішін күтпей-ақ құқық бұзушылықтың жолын кесуге мүмкіндік берілді. Тиісті істер бойынша тараптардың татуласуына жол берілмейді.

Халықаралық алаңда ұсынылған деректер Қазақстанда теңдік институттарын дамыту, құқықтық қорғауды күшейту және әйелдердің қоғамдық өмірге қатысу мүмкіндіктерін кеңейту бағытында жүйелі ілгерілеу бар екенін көрсетеді.