Грузия 102 заңсыз мигрантты, соның ішінде қазақстандықтарды елден шығарды
Грузия ІІМ заңсыз мигранттарға қарсы операция жүргізіп, 102 адамды елден шығарды. Олардың арасында Қазақстан азаматтары да бар. Бұзушыларға Грузияға кіруге тыйым салынды.
Сурет: azh.kz
Грузия заңсыз мигранттарға қарсы ауқымды шара қолданды. Елден шығарылған шетелдіктер арасында Қазақстан азаматтары да бар, деп хабарлайды Qazaqtoday.info сайты.
Грузия Ішкі істер министрлігінің деректерінше, соңғы бірнеше күн ішінде құқық қорғау органдары 102 шетел азаматын анықтап, оларды елден шығарды. Олардың барлығы Грузияда заңсыз жүрген, яғни рұқсат етілген мерзімнен асырған.
Депортацияланғандар тізімінде Қазақстан, Өзбекстан, Түрікменстан, Әзірбайжан, Ресей, Түркия, Үндістан, Пәкістан, Қытай, Таиланд және басқа да мемлекеттердің азаматтары көрсетілген.
Барлық бұзушыларға Грузияға қайта кіруге тыйым салынды. Ведомство тыйымның нақты мерзімін айтпағанымен, миграциялық заңнаманы қатаң бақылау жалғасатынын жеткізді.
Қазақстан азаматтары Грузияға визасыз кіре алады және 365 күнге (бір жылға) дейін бола алады. Алайда бұл мерзім өткен соң шетелдіктер не елден кетуге, не ресми тұруға рұқсат алуға міндетті. Мерзімді кешіктіргені үшін айыппұл, ал өрескел бұзушылық үшін мәжбүрлеп шығару және кіруге тыйым салу көзделген.
