Алакөлде аралда қалған отбасын ТЖМ құтқарды
Алакөлде демалыс кезінде кемедегі ақау салдарынан аралда қалған төрт адамды ТЖМ құтқарушылары аман алып шықты, эвакуацияланғандарға медициналық көмек қажет болмады.
Сурет: newtimes.kz
Алакөлде демалыс қайғыға ұласа жаздады. ТЖМ қызметкерлері көлдегі аралдардың бірінде қалған отбасын құтқарып, жағаға жеткізді, деп хабарлайды Qazaqtoday.info сайты.
Құтқарушылар жұмыс барысында көлдегі аралдардың бірінде отбасын анықтаған. Олардың жалдамалы кіші көлемді кемесі техникалық ақауға ұшырап, демалушылар өз бетінше жағаға қайта алмаған. ТЖМ қызметкерлері жүзгіш құралмен төрт адамды, оның ішінде бір баланы жағаға жеткізді. Эвакуацияланғандарға медициналық көмек қажет болмады.
Бұған дейін Солтүстік Қазақстан облысындағы Шалкар көлінде қатты жел салдарынан үрлемелі матрасымен жағадан алыстап кеткен демалушыны құтқарушылар тауып, жағаға шығарған болатын.
