Аргентина құрамасы Англияны жеңіп, футболдан ӘЧ-2026 финалына шықты
Футболдан ӘЧ-2026 жартылай финалында Аргентина құрамасы Англияны 2:1 есебімен жеңіп, финалға шықты. Соңғы минутта Лаутаро Мартинес шешуші гол соқты. Енді Аргентина Испаниямен финалда ойнайды.
Фото: Selección Argentina de fútbol
Атлантада өткен футболдан Әлем чемпионатының жартылай финалдық матчында Аргентина құрамасы Англияны 2:1 есебімен жеңіп, келесі кезеңге өтті, деп хабарлайды Qazaqtoday.info сайты.
Англия құрамасы Энтони Гордонның голымен есепті ашты. Алайда аргентиндіктер 85-минутта Энцо Фернандестің дәл соққысымен есепті теңестірді. Қосылған екінші минутта Лаутаро Мартинес соңғы нүкте қойды.
Аргентина құрамасы қатарынан екінші рет әлем чемпионатының финалына шықты. Олар титулды Испаниямен матчта қорғайды. Англия құрамасы қола жүлде үшін Франция командасымен кездеседі.
