Денсаулық сақтау министрлігі ыстық өткізіп алудың алдын алуды ескертеді
Денсаулық сақтау министрлігі ыстық өткізіп алудың белгілері, салдары және алғашқы көмек шаралары туралы ескертеді. Аптап ыстықта сақ болыңыз.
Күн қатты ысып, еліміздің көптеген аймағында аптап ыстық орнады. Денсаулық сақтау министрлігі тұрғындарды ыстық өткізіп алудан сақ болуға шақырып, оның алғашқы белгілері мен алғашқы көмек шараларын түсіндірді, деп хабарлайды Qazaqtoday.info сайты.
Ыстық өткізіп алудың негізгі белгілеріне дене температурасының күрт көтерілуі, әлсіздік пен бас ауруы, бас айналу, жүрек айну, сондай-ақ есеңгіреу мен естен тану жатады. Егер адамға дер кезінде дәрігерлік көмек көрсетілмесе, шамадан тыс ыстық миды, жүректі, бүйрек пен басқа да өмірлік маңызы бар органдарды зақымдап, ең ауыр жағдайда өлімге әкелуі мүмкін.
Осындай белгілер анықталған жағдайда жедел жәрдем (103) шақыру қажет. Дәрігерлер келгенше науқасты көлеңкеге жатқызып, денесін сулы орамалмен салқындатып, желдету ұсынылады. Сондай-ақ аптап ыстықта далада көп жүрмеу және суды көбірек ішу маңызды.
