Қасым-Жомарт Тоқаев АҚШ сенаторы Стив Дэйнсті қабылдады
Қасым-Жомарт Тоқаев АҚШ сенаторы Стив Дэйнсті қабылдап, екіжақты ынтымақтастық мәселелерін талқылады. Президент G20 саммитіне қатысу үшін АҚШ-қа сапар жасайтынын айтты.
Мемлекет басшысы Қасым-Жомарт Тоқаев АҚШ Конгресінің сенаторы Стив Дэйнсті қабылдады, деп хабарлайды Qazaqtoday.info сайты.
Кездесу барысында Президент сенаторды АҚШ тәуелсіздігінің 250 жылдығымен құттықтады. Қасым-Жомарт Тоқаев Қазақстан мен Құрама Штаттар арасындағы көпжоспарлы ынтымақтастықтың даму қарқынын жоғары бағалап, сауда-экономикалық және инвестициялық ықпалдастықтың тұрақты өсіміне назар аударды.
Президент өткен жылдың қараша айында АҚШ-қа сапары кезінде қол қойылған екіжақты келісімдерді сапалы жүзеге асырудың маңыздылығын атап өтті. Осы орайда Қасым-Жомарт Тоқаев жыл соңында Майамиде өтетін G20 саммитіне қатысу үшін АҚШ-қа жасайтын сапары аясында екіжақты ынтымақтастықты одан әрі тереңдетуге дайын екенін жеткізді.
Мемлекет басшысы сенатор Стив Дэйнске Қазақстан мен АҚШ арасындағы кеңейтілген стратегиялық серіктестікті нығайтуға қосқан үлесі, сондай-ақ Джексон-Вэник түзетулерінің күшін жою жөніндегі заңнамалық бастаманы ілгерілету мәселелерінде елімізді ұдайы қолдап келе жатқаны үшін алғыс білдірді.
