Қазақстан Ресейге 50 мың тонна бензин жеткізе ме? Министрлік түсініктеме берді

Қазақстан Ресейге 50 мың тонна бензин жеткізуі мүмкін бе? Энергетика министрлігі бұл мәселеге қатысты ресми мәлімдеме жасады, деп хабарлайды Qazaqtoday.info сайты.

Министрліктің баспасөз қызметінің ақпаратынша, Ресей үкіметінен отын сатып алу туралы ресми өтініш әлі түскен жоқ. Алайда, егер өтініш келіп түссе, Қазақстан «өзара тиімді коммерциялық шарттар негізінде жанар-жағармай материалдарын жеткізу мүмкіндігін қарастыруға дайын».

«Қазақстанның ішкі нарығын толық әрі үздіксіз қамтамасыз ету – сөзсіз басымдық болып қала береді. Экспорттық жеткізілімдер азаматтар мен ел экономикасының қажеттіліктерін қамтамасыз етуге қауіп төнбеген жағдайда ғана жүзеге асырылуы мүмкін», — делінген министрлік хабарламасында.

Бұған дейін Reuters саладағы төрт дереккөзге сүйене отырып, Қазақстан шілде-тамызда Ресейге 50 мың тонна бензинді гуманитарлық көмек ретінде жеткізуге келіскенін хабарлаған. Энергетика министрлігі ақпарат агенттігіне Ресей үкіметінен гуманитарлық көмек ретінде жанармай жеткізу туралы ресми сұраныс түспегенін айтқан.

Дегенмен министрлік Ресейдің «Татнефть» мұнай компаниясы жеткізетін нафтаны (тікелей айдалған бензинді) өңдейтін Батыс Қазақстан облысындағы «Конденсат» зауытынан жанармай жеткізілуі мүмкін екенін жоққа шығармаған.

«Конденсат» ЖШС өндіретін автокөлік бензинін жақын арада Ресейге жеткізу мүмкіндігі Қазақстанның ішкі нарығындағы мұнай өнімдерінің жеткіліктілік деңгейіне байланысты болмақ. Мұндай жеткізілім жүзеге асырылса, автокөлік бензині Ресейдің «Татнефть» компаниясы беретін шикізаттан өндіріледі», — делінген агенттікке берілген жауапта.

Ақпарат агенттігінің хабарлауынша, АИ-95 және АИ-92 маркалы бензиндері Батыс Қазақстан облысындағы «Конденсат» зауытынан және Павлодардағы мұнай өңдеу зауытынан жөнелтілуі тиіс.