Қазақстандық балуан Еркебұлан Анапия Азия чемпионаты финалына шықты
Қазақстандық балуан Еркебұлан Анапия грек-рим күресінен U20 Азия чемпионатының финалына шықты. Ол ирандық қарсыласпен белдеседі.
Таиландтың Паттайя қаласында өтіп жатқан U20 жас санатындағы Азия чемпионатында грек-рим күресінен Қазақстан намысын қорғап жатқан Еркебұлан Анапия финалға жолдама алды, деп хабарлайды Qazaqtoday.info сайты.
82 келіге дейінгі салмақта өнер көрсететін отандасымыз жартылай финалда тәжікстандық Мухаммад Султонзоданы 13-3 есебімен жеңді. Енді ол финалда Иран өкілі Алиреза Мохаммад Хоссейнимен күш сынасады.
Сонымен қатар, 60 келіге дейінгі салмақта Алпамыс Болатұлы қола жүлде үшін белдесуде жапониялық Юсукэ Хиротамен кездеседі. Ал 67 келіге дейінгі салмақта Досбол Шамиль үндістандық Ануджбен қола жүлдеге таласады.
97 келіге дейінгі салмақта Максим Украинцев Қытай өкілі Синью Люмен қола жүлдені сарапқа салады.
