Фото: Ашық дереккөз
Қайтыс болған мерзімді әскери қызметші Ербаян Мұхтардың жақындары оның әскерде ауыр жарақат алуына қатысты қозғалған істі әрі қарай тергеуді талап етпейтінін мәлімдеді, деп хабарлайды Qazaqtoday.info.
Сондай-ақ олар мәйітке қосымша сараптама жүргізуге де қарсы екенін мәлімдеді. Марқұмның ағасы Самат Мұстафиннің айтуынша, Ербаянның ата-анасы ұзаққа созылған тергеу мен күрестен кейін істі әрі қарай жалғастырмауға шешім қабылдаған. Отбасы үшін бастысы – марқұмның денесін елге әкеліп, оны лайықты түрде жерлеу.
«Біз мәйітті қайта ашуға да, қосымша тексерулерге де келіспейміз. Біздің бар мақсатымыз – Ербаянды жер қойнына тапсыру. Оның жаны тыныштық тапсын», – деді ол.
Бұған дейін туыстары мен Денсаулық сақтау министрлігі арасында сарбаздың өліміне қатысты түрлі пікірлер болған. Денсаулық сақтау министрлігі бұл мәлімдемелермен келіспейтінін білдіріп, Ербаянның өліміне ауыр бас-ми жарақатының салдары мен соған байланысты дамыған асқынулар себеп болғанын хабарлады. Ведомствоның мәліметінше, науқаста көп ағзалық жеткіліксіздік синдромы дамып, дәрігерлердің барлық күш-жігеріне қарамастан оның өмірін сақтап қалу мүмкін болмаған.
