«Қайрекеңнің туған жері»: Ләйлә Сұлтанқызы марқұм күйеуіне құран оқытты

Фото: видеодан скрин

Тележүргізуші Ләйлә Сұлтанқызы әлеуметтік желідегі парақшасында балаларына ата-бабасының туған жерін танытып, туған ауылға тағзым етудің маңызын сөз етті, деп хабарлайды Qazaqtoday.info сайты. 

Журналист жұбайы Қайрекеннің туған жері – Түркістан облысындағы Қызылкөл ауылына жыл сайын балаларымен барып, ата-бабаларына Құран бағыштауды дәстүрге айналдырғанын айтты.

«Ер баланың өз тегін біліп, ата-бабасының шыққан жерін көріп өскені өте маңызды. Оның болашағына да, адамдармен қарым-қатынасына да әсері мол. Қайрекеннің туған жері – Қызылкөл. Балалық шағы өткен, әр тасы мен сүрлеуі таныс шағын ауыл. Бүгінде онда жүзден сәл ғана аса шаңырақ бар. Жыл сайын осы ауылға ұлдарды ертіп барып, Қайрекеннің ата-бабаларына, жақындарына Құран бағыштауды дәстүрге айналдырғанбыз. Биыл да қонақасы беріп, волейболдан турнир ұйымдастырып, ас беріп қайттық», – деп жазды ол.

Тележүргізуші туған жерден алыстаса да, адам өзінің тамырын ұмытпауы керек екенін айтып, өткендерді еске алып, аруақтарға дұға бағыштауға шақырды.

«Біз ауылдан кеткенімізбен, ауыл бізден кеткен емес. Тамырыңды ұмытпау, өткендерді түгендеу, аруақтарға дұға бағыштау – кейінге қалдыра беретін дүние емес. Өткендерді түгендеңіздер, аруақтарды разы қылыңыздар. Ертең кеш болып қалмасын», – деді Ләйлә Сұлтанқызы.