«Психикалық орталыққа жатқызбаңыздар…»: Сотта Ақбаян Мұқанғалиеваның жауабы жарияланды (ВИДЕО)

Атырау облысында қайын жұртының төрт адамын өлтірді деп айыпталып жатқан Сұлтан Сәрсемәлиевтің сотында жаңа бейнематериалдар қаралды. Кезекті сот отырысында Ақбаян Мұқанғалиеваның тергеу кезіндегі жауабы жария етілді, деп хабарлайды Turkystan.kz-ке сілтеме жасаған Qazaqtoday.info.

Сот мәліметінше, ол психоневрологиялық диспансердің ақпараттық жүйесінде есепте тұрған және қазір психиатриялық мекемеде ем қабылдап жатыр.

Жауап алу кезінде әйел отбасы, денсаулығы туралы сұрақтарға жауап берген.

«Мен басымды тексертіп, ем алдым. Түркияда күйеуім уақытша жұмыс істеді. Біз қонақүйде тұрдық. Мен көбіне ұйықтап жаттым. Телефоным болған жоқ, оны Сұлтан алып алған. Полиция мені және күйеуімді не үшін ұстағанын білмеймін. Менің ешқандай психикалық ауруым жоқ, мені психикалық орталыққа жатқызбаңыздар», – деп жауап берген деді судья.

Бейнежазбаға сәйкес, Мұқанғалиева кей сұрақтарға нақты жауап бере алмаған және шаршағанын айтып, жекелеген сауалдарға жауап беруден бас тартқан. Кейін оған арнайы ем қабылдау ұсынылғаны айтылды.