Атырау тұрғындары маса мен шіркейдің талауына ұшырап, әкімдіктен шара қолдануды талап етеді
Атырау тұрғындары маса мен шіркейдің талауына ұшырап, әкімдіктен шара қолдануды талап етеді. Кішкентай балалардың денсаулығына қауіп төніп тұр.
Атырауда халық жаппай маса мен шіркейдің талауына түсіп, әбден зәрезап болды. Жергілікті тұрғындардың айтуынша, қазір ешқандай қорғаныс спрейлері мен арнайы кремдер көмектеспейді. Бұл мәселе әсіресе кішкентай балалардың денсаулығына үлкен қауіп төндіріп тұр, деп хабарлайды Qazaqtoday.info сайты.
Әлеуметтік желіде тараған суреттерден балалардың денесінде сау тамтық қалмағаны көрінеді. Мұнайлы өңірдің жұрты «шенеуніктер бюджеттің ақшасын жеп отырғанда, бізді қара шыбын мен маса жеп бітірді» деп ашынуда. Жыл сайын миллиондап ақша бөлінгенімен, улау жұмыстарының нәтижесі мүлдем сезілмейді.
Қала халқы әкімдіктен бұл сұмдықты тез арада тоқтатып, нақты шара қолдануды талап етуде. Тұрғындар күннен-күнге өршіп бара жатқан бұл экологиялық апаттан шаршағанын айтады. Жауапты тұлғалардың халық мұңына қашан құлақ асатыны әзірге белгісіз.
