Головкин АҚШ-та жанкүйерлер назарында: Бокс Даңқ Залына ену рәсімі басталды
Геннадий Головкин АҚШ-та бокстан Халықаралық Даңқ Залына ену рәсіміне келіп, жанкүйерлер назарында қалды. Ол IBHOF мүшесі атанған тұңғыш қазақстандық.
Сурет: sports.kz
Қазақстан Ұлттық Олимпиадалық комитетінің басшысы және World Boxing президенті Геннадий Головкин Нью-Йорк штатындағы Канастота қаласына бокстан Халықаралық Даңқ Залына (IBHOF) ену рәсіміне келді. Оның келуі жергілікті жанкүйерлер арасында үлкен қызығушылық тудырды, деп хабарлайды Qazaqtoday.info сайты.
ҰОК баспасөз қызметі Instagram-да видео жариялады, онда Головкиннің қонақүй фойесінде, көшеде және басқа да жерлерде жанкүйерлерге автограф беріп, назар орталығында болғаны көрсетілген.
Головкин — IBHOF мүшесі атанған тұңғыш қазақстандық. Салтанатты рәсім 11-14 маусым аралығында өтеді. Шешімді сарапшылар, бокс туралы жазатын американдық журналистер қауымдастығы (BWAA) және халықаралық бокс тарихшылары қабылдайды. Спортшы белсенді мансабын аяқтағаннан кейін үш жыл өткен соң қосылу құқығына ие болады.
IBHOF-қа боксты дамытуға, тарихына және танымалдылығына елеулі үлес қосқандар кіреді. Спортшылар үшін басты критерий — рингтегі ерекше жетістіктер, оларды әлемдік спорт аңыздары ретінде анықтайды.
