Фото: видеодан скрин
Семейдегі кезекті нөсер жауын қаланың тағы бір жүйелі сорын бетіне шығарды. Көжзауыт ауданында пайда болған алып «көлшіктер» тұрғындардың берекесін қашырып отыр.
Егде жастағы адамдар мен балалы аналар діттеген жеріне жету үшін шақырымдап айналып жүруге мәжбүр. Бұл — жай ғана табиғаттың тосын мінезі емес, инфрақұрылымның әлсіздігі.
Мәселе тек су тасқынымен шектелмейді. Дауылды жел ағаштарды құлатып қана қоймай, қала орталығындағы талай үйді жарықсыз қалдырды. Дәл стихияның қызған шағында халықтың қараңғыда қалуы — коммуналдық қызметтердің дайындық деңгейін анық көрсетіп берді. Қалалықтар жауапты мекемелерден құрғақ уәде емес, жедел әрі нақты іс-қимыл талап етеді. Сұрақ біреу: Семейдің кәріз жүйесі қашанғы халықтың жүйкесін сынайды?
