Қазақстанда «Мерейлі отбасы» ұлттық конкурсына өтінім қабылдау басталды
«Мерейлі отбасы» ұлттық конкурсына өтінімдер қабылдау басталды. Қатысу шарттары, құжаттарды тапсыру мерзімі және байқаудың негізгі мақсаттары туралы.
Елімізде дәстүрлі «Мерейлі отбасы» ұлттық конкурсының бірінші, яғни аудандық кезеңіне құжат қабылдау басталғаны жарияланды. Отбасы институтын нығайтуға бағытталған байқауға өтінімдер 14 маусымға дейін қабылданады деп хабарлайды Qazaqtoday.info сайты.
Байқаудың негізгі мақсаты – отбасы институтын, адамгершілік пен руханиятты нығайту, жауапты ерлі-зайыптылықтың маңызын тану. Сонымен қатар, конкурс ата-аналардың бала тәрбиесіндегі жауапкершілігін арттыруға, отбасылық құндылықтарды дәріптеуге және қазақстандық отбасының жағымды имиджін қалыптастыруға бағытталған.
Конкурсқа қатысу үшін өтінімдер 2026 жылдың 15 мамырынан 14 маусымына дейін қағаз немесе электронды нұсқада қабылданады. Байқау шарттары мен қажетті құжаттар тізімі туралы толық ақпаратты тұрғылықты мекенжай бойынша аудан әкімдіктерінен алуға болады.
