Астанада жүк көлігі велосипед мінген баланы қағып кетті
Фото: pixabay
Астанада жүк көлігі велосипед мінген кәмелетке толмаған баланы қағып, оқиға орнында көз жұмды, деп хабарлайды Qazaqtoday.info ақпарат порталы.
Қайғылы жол апаты 26 мамыр күні Тәуелсіздік даңғылы мен Пушкин көшесінің қиылысында болған. Әлеуметтік желіде тараған мәліметке сүйенсек, көз жұмған бала елордалық мектептердің бірінде 5-сыныпта оқыған.
Астана қалалық полиция департаментінің хабарлауынша, Mercedes маркалы жүк көлігінің жүргізушісі велосипедпен жолды кесіп өтпек болған оқушыны қағып кеткен. Салдарынан жасөспірім ауыр жарақат алып, оқиға орнында жан тапсырған.
Аталған факті бойынша қылмыстық іс қозғалды. Көлік коммуналдық тұраққа қойылып, оқиғаның барлық мән-жайы анықталып жатыр.
Полиция жүргізушілерді жол қозғалысы ережелерін қатаң сақтауға, әсіресе мектеп маңы, тұрғын аймақтар мен жаяу жүргіншілер өткелдерінде барынша мұқият болуға шақырды. Ведомство өкілдері рөлдегі бір сәттік салғырттық орны толмас қайғыға әкелуі мүмкін екенін ескертті.
