«Әділет» партиясы құрылтайдан барынша көп орын алуды көздейді

Жаңадан құрылған «Әділет» партиясы алдағы құрылтайда мүмкіндігінше көп орын алуды көздеп отыр. Партия өкілі, саясаттанушы Борибай Нұрмұхамбеттің айтуынша, саяси бірлестіктің амбициясы жоғары. Бұл туралы партияның құрылтай съезінен кейін белгілі болды, деп хабарлайды Qazaqtoday.info сайты.

Айта кетейік, партия төрағасы Айбек Дәдебай съезден кейін БАҚ өкілдерінің алдына шықпады. Саяси кеңес мүшесі Рауан Кенжеханұлы оның алда атқаратын жұмысы көп екенін, сондықтан журналистер сауалына жауап беруге әлі мүмкіндік болатынын түсіндірді.

Сонымен қатар Рауан Кенжеханұлы партияның негізгі мақсаты бәсекелестік үшін күресу емес екенін атап өтті. «Саяси партияның міндеті – біреумен бәсекелесу емес. Партияның міндеті – өзекті мәселелерді шешіп, елді жақсарту. Біз қарапайым халықтан олар үшін әділеттілік деген не, оны күнделікті өмірде сезінуге не кедергі екенін сұрап жатырмыз. Осы пікірлерді жинақтап, соның негізінде бағдарлама, идеялар мен ұсыныстар дайындау – қазіргі міндетіміз», – деді ол.

Партияның қаржыландырылуына қатысты сұраққа жауап берген Кенжеханұлы олардың құндылықтарын қолдайтын кәсіпкерлердің де көмектесетінін жеткізді.