Сурет: kaztag.kz
Мемлекет басшысы Қасым-Жомарт Тоқаев Қазақстан халқын Отан қорғаушылар күнімен құттықтады. Президенттің құттықтауын Ақорданың баспасөз қызметі жариялады, деп хабарлайды Qazaqtoday.info сайты.
«Бұл мерекенің мемлекеттік және қоғамдық маңызы ерекше. Ол – Отанымыздың игілігі жолында қызмет еткен және қызмет етіп жүрген, еліміздің тыныштығын, аумақтық тұтастығын, тұрақтылығы мен қауіпсіздігін күні-түні күзетіп тұрған барша азаматтардың басын біріктіреді. Біздің сарбаздарымыз бен сардарларымыз батыр бабаларымыздың даңқты дәстүрін жалғастырып, шынайы патриотизмнің жарқын үлгісін көрсетіп келеді», – делінген Президенттің құттықтауында.
Мемлекет басшысы атап өткендей, еліміздің сарбаздары мен офицерлері, барлық күштік құрылымдардың қызметкерлері бітімгерлік миссиялар, арнайы оқу-жаттығулар мен түрлі халықаралық жарыстар барысында жоғары кәсібилік, тәртіп пен жауынгерлік шеберлік танытып, ең күрделі тапсырмаларды орындауға дайын екендерін дәлелдеп келеді.
Қасым-Жомарт Тоқаев мемлекеттің қорғаныс қабілетін арттыруға және әскери қызметшілерді жан-жақты қолдауға әрдайым баса мән беретінін жеткізді. «Жаңа Конституцияда «Қазақстан Республикасын қорғау – оның әрбір азаматының қасиетті парызы әрі міндеті» деп нақты жазылған. Бұл сөздер ел мен халықтың ажырамас байланысын, әрбір азаматтың Отан тағдырына деген жауапкершілігін білдіреді», – деп атап өтті Президент.
Сөз соңында Президент Отан қорғаушыларға табандылығы, үлгілі қызметі және антқа адалдығы үшін ризашылығын білдіріп, барша азаматтарға зор денсаулық, бақ-береке және толағай табыс тіледі. «Армия мен халықтың мызғымас бірлігі нығая берсін! Қасиетті Тәуелсіздігіміз тұғырлы болсын!» – деп түйіндеді Мемлекет басшысы.
