Әкімдікті бопсалаған блогер 5 жылға сотталды: ол 10 млн теңге талап еткен

Шымкентте қала әкімдігінің қызметкерінен 10 миллион теңге бопсалаған блогерге қатысты сот үкімі шықты, деп хабарлайды Qazaqtoday ақпарат агенттігі.

Сот материалына сәйкес, блогер өткен жылдың қазан айында әлеуметтік желіде Шымкент әкімдігінің беделіне нұқсан келтіретін жазба жариялаған. Осыдан кейін ол әкімдік өкілінен 10 миллион теңгеге ақпараттық мемлекеттік сатып алу шартын жасасуды талап еткен.

Егер шенеунік бұл талаптан бас тартса, блогер әкімдіктің қызметі туралы жағымсыз ақпаратты интернетте таратамын деп қорқытқан. Нәтижесінде 6 қарашада ол 990 000 теңге алған.

Сотта айыпталушы кінәсін ішінара мойындап, өзін бас бостандығынан айырмауды сұрады.

Сот блогерді бопсалау бабы бойынша кінәлі деп танып, бес жылға бас бостандығынан айырды. Сонымен қатар оған осы мерзімге БАҚ-қа қатысты қызметпен айналысуға тыйым салынды. Сот үкімі әлі заңды күшіне енген жоқ.

Осыған ұқсас жағдай сәуір айында Қостанай облысында да тіркелген. Ол кезде блогер Миршат Сәрсенбаев аса ірі мөлшерде ЖШС-дан ақша бопсалағаны үшін сотталған еді.

Фото: Әлеуметтік желіден