Мұғалім мен дәрігер жалақысы қашан өседі? Азамат Әмрин жауап берді

Фото: видеодан скрин

Қазақстанда азаматтық қызметкерлердің жалақысын көтеру мәселесі тағы да кейінге қалуы мүмкін. Бұл туралы QazaqToday.info ақпараттық порталы хабарлайды.

Бұл туралы ҚР ұлттық экономика бірінші вице-министрі Азамат Әмрин мәлімдеді.

Оның айтуынша, жалақыны арттыруға қатысты шешімдер келесі жылдың бюджетін қалыптастыру кезінде қаралады. Бағдарлама әзірленгенімен, ол әлі мемлекеттік органдармен келісу кезеңінде. Вице-министр жалақы өсімі бюджет мүмкіндігіне тікелей байланысты екенін атап өтті. Сонымен қатар, өткен жылы төменгі буындағы кейбір қызметкерлердің еңбекақысы артқанын еске салды. Ал Қарашығанақтағы газ өңдеу зауытының құрылысына қатысты оператордың өзгеруі де сұрақ тудырды. Бұл мәселеге ҚР энергетика вице-министрі Қайырхан Тұтқышбаев жауап берді.

Оның сөзінше, жобаны «QazaqGaz» компаниясына беру «Самұрық-Қазына» қорының ішкі шешімі. Бұған дейін оператор ретінде «ҚазМұнайГаз» қарастырылған еді. Министрлік өкілі бұл өзгеріс орындаушылыққа емес, ресурстарды тиімді қамтамасыз етуге байланысты екенін айтты. Журналистер тарапынан жобаның сенімділігіне қатысты күмән да көтерілді. Алайда ведомство өкілі бұл жерде негізгі мәселе басқаруда емес, қаржылық және техникалық мүмкіндіктерде екенін алға тартты.