Бангладеште қызылша өршіді: бір айда 100-ден астам бала қайтыс болды
Бангладеште қызылша індеті асқынып, бір айда 100-ден астам сәби көз жұмды. Елде шұғыл вакциналау басталды, жағдай күрделі.
Бангладеште қауіпті қызылша індеті өршіп, соңғы бір айдың ішінде 100-ден астам баланың өмірін қиды. Аурудың жаппай таралуына байланысты елде шұғыл вакциналау науқаны басталды, деп хабарлайды Qazaqtoday ақпарат агенттігі.
Наурыз айының ортасынан бері елде 7500-ден астам адамның қызылша жұқтырғаны тіркелді. Бұл өткен жылғы көрсеткішпен салыстырғанда (125 жағдай) өте жоғары.
Ауруға шалдыққандардың үштен бірі – жоспарлы екпе салынбайтын 9 айға толмаған сәбилер. Олар індет алдында әлсіз болып отыр.
ЮНИСЕФ бұл дағдарысты 2020 жылдан бері пандемия мен саяси тұрақсыздыққа байланысты жаппай вакциналау науқандарының тоқтап қалуымен байланыстырады.
Сондай-ақ, елдегі дәрі-дәрмек тапшылығына бұрынғы уақытша үкіметтің кезіндегі сатып алу жүйесінде жіберілген қателіктер себеп болғаны айтылуда.
Фото: Әлеуметтік желіден
