8 наурызға тосынсый: Астанада боран, Алматы мен Шымкентте нөсер жауады
Синоптиктер 8-10 наурыз аралығында Қазақстанның ірі қалаларында ауа райының қандай болатынын болжады. Астанада боран, Шымкентте нөсер күтіледі.
Мереке күндері Қазақстанның ірі қалаларында ауа райы күрт өзгереді. Елордада боран соғып, күн суытса, оңтүстік мегаполистерде қатты жаңбыр күтіледі, деп хабарлайды Qazaqtoday ақпарат агенттігі.
«Қазгидромет» РМК синоптиктері 8-10 наурызға арналған ауа райы болжамын жариялады.
Астанада мерекенің алғашқы күні, 8 наурызда, қар аралас жаңбыр жауып, бұрқасын соғады және көктайғақ болады. Оңтүстік-батыстан соққан желдің екпіні секундына 23 метрге дейін жетуі мүмкін. Ауа температурасы түнде 0…-2°С, күндіз 0…+2°С шамасында болады. 9 наурызда қар жауып, боран жалғасады, температура түнде -8°С, күндіз -6°С дейін төмендейді. Ал 10 наурызда аяз күшейіп, түнде сынап бағаны -17°С, күндіз -15°С көрсетеді.
Алматыда 8 наурыз жауын-шашынсыз, жылы болады. Ауа температурасы күндіз +14…+16°С дейін көтеріледі. Алайда 9 наурыз күні кешке жаңбыр жауа бастайды. 10 наурызда жауын-шашын қарға ұласып, күн күрт суытады. Температура түнде 0…-2°С, ал күндіз небәрі +1…+3°С болады. Синоптиктер қала тұрғындарына тұман түсетінін де ескертеді.
Шымкентте мерекелік демалыс толығымен жаңбырлы өтеді. 8 наурызда жаңбыр жауып, тұман түседі, күндіз ауа +16°С дейін жылиды. 9 наурызда жауын күшейіп, нөсерге айналуы ықтимал. Солтүстік-батыстан соққан желдің екпіні секундына 20 метрге жетуі мүмкін. 10 наурызда да қатты жауын-шашын сақталады.
Фото: Әлеуметтік желіден
