«Адам факторы емес»: Министр құлаған Су-30СМ жойғышы туралы айтты
Қорғаныс министрі Қарағанды облысында құлаған Су-30СМ жойғыш ұшағы апатының алдын ала себебін атады. Оның айтуынша, бұл ұшқыш қателігі емес.
Қарағанды облысында құлаған Су-30СМ жойғыш ұшағына қатысты Қорғаныс министрі Дәурен Қосанов пікір білдірді, деп хабарлайды Qazaqtoday ақпарат агенттігі.
Министрдің сөзінше, апатқа ұшқыштардың қателігі себеп болмаған. Ол ұшақтың жап-жаңа болғанын, небәрі 230 сағат ұшқанын атап өтті. Ресейде жасалған жойғыш Қазақстан әскерінің қаруына 2022 жылы ғана алынған.
«Ең бастысы, ұшқыштар аман. Олар катапульта жасап үлгерді. Қазір олардың өмірі мен денсаулығына ешқандай қауіп төніп тұрған жоқ», — деді ведомство басшысы.
Апат 25 ақпан күні Қазақстан мен Ресейдің әуе шабуылына қарсы қорғаныс күштерінің бірлескен оқу-жаттығуы кезінде болған. Ұшақ жоспарлы ұшу тапсырмасын орындап жатқан.
Қазіргі уақытта оқиғаның себептерін анықтау үшін арнайы комиссия жұмыс істеп жатыр. Тергеу нәтижелері кейінірек жарияланады.
Фото: Әлеуметтік желіден
