Жапаров Қазақстандағы өзгерістерді қолдады: маңызды мәлімдеме жасады
Қасым-Жомарт Тоқаев пен Садыр Жапаров телефонмен сөйлесті. Қырғызстан президенті Қазақстандағы конституциялық реформаларды қолдайтынын айтты.
Мемлекет басшысы Қасым-Жомарт Тоқаев Қырғызстан президенті Садыр Жапаровпен телефон арқылы сөйлесті, оның барысында қырғыз лидері Қазақстандағы ауқымды өзгерістерге қолдау білдірді, деп хабарлайды Qazaqtoday ақпарат агенттігі.
Ақорданың ресми хабарлауынша, Қасым-Жомарт Тоқаев әріптесіне елімізде жүргізіліп жатқан конституциялық реформаның мән-маңызын түсіндірді. Оның айтуынша, бұл жаңғыртулар мемлекеттің орнықты дамуына негіз қалайды.
«Қырғызстан Президенті Қазақстандағы ауқымды өзгерістерді қолдайтынын мәлімдеді», — делінген ресми хабарламада.
Сонымен қатар екі ел көшбасшылары қазақ-қырғыз қарым-қатынасының оң қарқынын атап өтті. Тараптардың пікірінше, тұрақты саяси диалог пен үкіметтер арасындағы белсенді ықпалдастық сауда-экономика, көлік-логистика және су-энергетика салаларындағы ынтымақтастықтың дамуына септігін тигізіп отыр.
Сондай-ақ Қазақстан Президенті Бішкекте өтетін Шанхай ынтымақтастық ұйымының саммиті мен Дүниежүзілік көшпенділер ойындары сияқты маңызды халықаралық іс-шаралардың сәтті өтуіне тілектестік білдірді.
Сөз соңында Қасым-Жомарт Тоқаев Садыр Жапаровтың ел бірлігін сақтап, қырғыз мемлекеттілігін нығайтуға бағытталған саясатын толық қуаттайтынын жеткізді.
Фото: Әлеуметтік желіден
