Мұнайдағы 6 млрд дауы: Мәжілісте министрлікке ауыр айып тағылды

Фото: Мәжіліс

Мәжілістің Экология және табиғат пайдалану комитетінің отырысында депутат Мұрат Әбенов пен Энергетика вице-министрі Ерлан Ақбаров арасында мұнай саласындағы қаржыға қатысты дау туындады. Жиын барысында депутат саладағы тапсырыстарды орналастыру кезінде заңбұзушылықтар болуы мүмкін екенін айтып, жауапты ведомствоның жұмысын қатаң сынға алды. Бұл туралы QazaqToday.info ақпараттық порталы хабарлайды.

Әбеновтің сөзінше, мұнай компаниялары арқылы қаржы жымқыру деректері Президент деңгейінде қаралуы тиіс. Ол бір компанияда 6 млрд теңгені жымқырған екі қызметкер сотталғанын алға тартты. Депутат ұйым жыл сайын ірі тапсырыстар алып отырғанымен, мемлекетке төлеген корпоративтік табыс салығы мардымсыз болғанын мәлімдеді.

Өз кезегінде вице-министр Ерлан Ақбаров аталған мәселеге қатысты компаниялар арасында сот процестері әлі жалғасып жатқанын айтты. Оның пікірінше, болған жайтты әзірге «ұрлық» деп нақты квалификациялауға болмайды.

Алайда депутат бұл уәжбен келіспей, сот шешімі 6 млрд теңге көлеміндегі қаржылық заңбұзушылықты растағанын мәлімдеді. Ол вице-министрді «жалған ақпарат берді» деп айыптап, мемлекеттік қызметкер ретінде сот шешіміне қарсы пікір айту орынсыз екенін жеткізді.

Кейін Ақбаров сөз болып отырған іс жалған кәсіпкерлік фактілеріне қатысты екенін түсіндірді. Депутат болса, министрлік өкілі іс материалдарымен толық таныс емес болуы мүмкін деген күмән келтірді.

Осылайша, Мәжіліс қабырғасында мұнай саласындағы миллиардтаған қаржыға қатысты мәселе қызу пікірталасқа ұласып, жауапты органдар жұмысына қатысты жаңа сауалдар туғызды.