Италияда Қысқы Олимпиада басталды: Қазақстан туын екі спортшы алып шықты
Италияда Қысқы Олимпиада ойындары басталды. Ашылу салтанатында Қазақстан туын шорт-трекші Денис Никиша мен могулшы Аяулым Әміренова ұстады.
Италияда Қысқы Олимпиада ойындарының салтанатты ашылу рәсімі өтті. Ел намысын қорғайтын спортшыларымыз да жарыс жолына шығуға дайын, деп хабарлайды Qazaqtoday ақпарат агенттігі.
Бұл жолғы ашылу салтанатының ерекшелігі – ол бірнеше қалада қатар өтті. Осыған байланысты Қазақстанның мемлекеттік туын екі спортшымыз алып шығу мәртебесіне ие болды.
Милан қаласында өткен ұлттар шеруінде көк байрақты шорт-трек шебері Денис Никиша ұстаса, Ливиньо коммунасындағы рәсімде фристайл-могулдан сынға түсетін Аяулым Әміреноваға сенім артылды.
Олимпиада ойындары 6 ақпаннан 22 ақпанға дейін жалғасады. Дүбірлі додада Қазақстан атынан 10 спорт түрінен 36 атлет (18 ер және 18 әйел) бақ сынайды.
Фото: ҰОК
