Шымкенттегі Нұрайдың өлімі: Тоқаевтың тапсырмасынан кейін полицейлерге іс қозғалды

Ішкі істер министрінің орынбасары Санжар Әділов қызметтік салғырттық танытқан бірқатар полиция қызметкеріне қатысты қылмыстық іс қозғалғанын айтты. Бұл туралы Qazaqtoday.info ақпарат порталы хабарлады.

Еске салсақ, 20 қаңтарда Мемлекет басшысы жергілікті полиция бөлімінің әрекеттерін тексеруді тапсырған еді. Себебі құқық қорғау органдары қыздың өзіне қауіп төніп тұрғаны жөніндегі бірнеше мәрте жасаған өтініштеріне дер кезінде әрі тиісті жауап қатпаған. Соның соңы қайғылы жағдаймен аяқталды.

Сондай-ақ Шымкент қаласы полиция департаментінің бастығы мен бірінші орынбасары қызметінен босатылды

Президенттің тапсырмасынан кейін сол күні-ақ жергілікті полицияның басшысы мен оның орынбасары қызметтерінен босатылды. Ал 22 ақпанда министр орынбасары Санжар Әділов немқұрайлыққа жол берген қатардағы полицейлерге қатысты қылмыстық істер тіркелгенін мәлімдеді.

Айта кету керек, аталған оқиғаға Президент назар аударған соң ғана мемлекеттік органдар тергеу жұмыстарын белсенді түрде қолға алды.