Қарағанды: Балалар үйінің тәрбиеленушілерін несие алуға мәжбүрлеп, тонап келген

Қарағандыда полиция қызметкерлері балалар үйінің тәрбиеленушілерін бопсалап келген ұйымдасқан қылмыстық топтың жолын кесті, деп хабарлайды Qazaqtoday ақпарат агенттігі.

Прокуратураның қолдауымен өткен арнайы операция нәтижесінде бірнеше адамнан құралған топ ұсталған. Тергеу мәліметтеріне сәйкес, олар балаларға тиесілі мемлекеттік жәрдемақыны алдау, қорқыту және күш көрсету арқылы тартып алып отырған.

Сонымен қатар, күдіктілер жәбірленушілерді микроқаржы ұйымдарынан өз аттарына несие рәсімдеуге мәжбүрлегені анықталды.

«Алдын ала есеп бойынша, соңғы жарты жылда келтірілген шығын көлемі 10 миллион теңгеден асып жығылады», — деп хабарлады құқық қорғау органдары.

Тінту барысында күдіктілерден оқ-дәрілер мен атыс қаруына арналған оқжатарлар тәркіленді. Қазіргі уақытта топтың барлық мүшесі қамауға алынып, соталды тергеу амалдары жүріп жатыр. Олар 10 жылға дейін бас бостандығынан айырылуы мүмкін.

Фото: Polisia.kz