Иранда көтерілістер басылмай тұр: Аятолла Хаменеи Мәскеуге қашуға дайын
Иранда наразылықтар үдей түсті. The Times дерегінше, аятолла Хаменеи Мәскеуге қашуға жоспар дайындаған.
Фото: pexels.com
Иранда наразылықтар екінші апта жалғасып жатыр. 2025 жылғы 28 желтоқсаннан бері кемінде 12 адам қаза тапты, олардың қатарында қауіпсіздік қызметкерлері де бар, деп хабарлайды Qazaqtoday ақпарат агенттігі.
Бәрі Тегеранда дүкен иелерінің ереуілінен басталған. Қазір елдің бірнеше аймағында шерулер жалғасуда. Жоғарғы көшбасшы аятолла Әли Хаменеи наразыларды «тәртіп бұзушылар» деп атап, оларды басуға бұйрық берген.
«Біздің жаулар елде бүлік тудыруға тырысып жатыр. Біз оларға жол бермейміз», – деді аятолла Хаменеи.
Al Jazeera мәліметінше, қауіпсіздік күштері наразылықты күшпен тоқтатуға кіріскен. Алайда The Times газетінің жазуынша, егер билік наразылықты баса алмаса немесе қауіпсіздік құрылымдары көшбасшыны қолдамай кетсе, Хаменеи Ираннан кетуге дайын.
«Хаменеи Ресейді баспанасы ретінде қарастырып отыр», – делінген The Times дәлел ретінде келтірген барлау құжаттарында.
Бұл ақпарат ресми түрде расталмаған, бірақ Иранда жағдай ушыға түсуде. Ақ үй мен Еуропа елдері оқиғаларды жіті бақылап отыр.
