Бестеректегі балалар өлімі: Жүргізуші 50 млн төлеуге міндеттелді

Фото: видеодан скрин

Абай облысындағы Бестерек ауылында төрт баланың қаза табуына себеп болған жол-көлік оқиғасына қатысты сот шешімі шықты. Оқиғаға кінәлі деп танылған жүргізушіден марқұм балалардың ата-аналарына 50 миллион теңге көлемінде моральдық өтемақы өндірілмек, деп хабарлайды Qazaqtoday.info ақпарат порталы.

Іс материалдарында көрсетілгендей, апат кезінде жүргізушіде эпилепсиялық ұстама болып, салдарынан көлікті басқару мүмкіндігінен айырылған. Жаза тағайындау барысында сот бірқатар жеңілдететін жағдайларды назарға алды. Атап айтқанда, айыпталушының өз кінәсін толық мойындауы және оның асырауында кәмелетке толмаған баланың болуы ескерілген.

Сот отырысының нәтижесінде жәбірленуші тараптың азаматтық талабы қанағаттандырылып, жауапкерге 50 миллион теңге моральдық шығын өтеу міндеті жүктелді. Алайда бұл үкім әзірге заңды күшіне енген жоқ.