Асанәлі Әшімовтің жаназасында мобилографпен жүрген Сәкен Майғазиев сынның астында қалды

21 желтоқсанда Қазақстан және КСРО Халық әртісі, «Отан», «Құрмет», «Қазақстанның Еңбек ері» ордендерінің иегері Асанәлі Әшімов өмірден өтті. Атақты актердің қонағасы мен жаназасына Алматыда көп адам жиналды.

Марқұммен қоштасуға келгендердің қатарында танымал әнші Сәкен Майғазиев те болған. Алайда оның қасына мобилограф ертіп барғаны әлеуметтік желіде қызу талқыға түсті.

Желі қолданушыларының айтуынша, қонағасы кезінде мобилограф әншінің кімдермен амандасып, кімдерге көңіл айтқанын үздіксіз түсіріп жүрген. Кейін бұл видео әлеуметтік желіге жүктелген.

Дегенмен, көпшілік тарапынан сын көбейген соң, видео өшірілгені айтылып жатыр. Соған қарамастан, талқылау тоқтамады.

Желі қолданушылары не дейді?

Threads платформасында пікір білдірген оқырмандардың бірі мобилографпен жаназаға баруды орынсыз деп бағалаған. Оның жазбасында «концертте түсірілім жасау – бір мәселе, ал қаралы жиында камера ұстау – басқа» деген ой айтылады.

Пікір иесі сондай-ақ сахна сыртындағы сәттерді де ұдайы түсіру әдетке айналып бара жатқанын тілге тиек еткен. Мұндай контенттің қаралы жиында жариялануы жұрттың көңіліне қаяу түсіретінін жазғандар да бар.

Қоштасу рәсімі қалай өтті?

Асанәлі Әшімов қазақ руханиятының дамуына өлшеусіз үлес қосқан, театр мен кино өнерінде биік кәсіби мектеп қалыптастырған дара тұлға ретінде ел жадында қалды. Оның өнердегі ізі бірнеше буынға үлгі болды.

Актер 23 желтоқсанда Алматыдағы «Кеңсай-1» зиратына жерленді. Қоштасу рәсіміне әріптестері, өнер адамдары, қоғам қайраткерлері және қала тұрғындары жиналды.