«Сізді бізге әкім етіп қойған Аллаға да, президентке де рақмет»: Шымкент әкіміне блогер жағымпазданды

Фото: стоп-кадр

Шымкент әкімі Ғабит Сыздықбеков Орталық коммуникациялар қызметінде халық алдында есеп берді. Жиын барысында сөз алған блогер-журналист Бахытжан Копбаев әкімге ашық түрде алғыс білдіріп, мақтады.

Ол былай деді: «Ғабеке, сіз келгенге дейін Шымкент үлкен ауылдың күйін кешіп, дамуы баяулап тұрған еді. Қазір тұрғындар «қаламызды көркейтіп жүрген әкім ертең басқа жаққа ауысып кетсе, біз тағы сол күйге түсіп қалмаймыз ба?» деп уайымдайды».

Осылайша, әкімнің еңбегін атап өткен ол қала басшысына ерекше ризашылығын жеткізді. Алайда оның мақтауына Шымкент әкімі аса қуана қойған жоқ, жұмысына бағаны мемлекет басшысы беретінін жеткізді.