Талдықорғанда әйелін ұрып, қарумен қорқытқан ер адам ұсталды
Талдықорғанда әйелін ұрып, көршілеріне қарумен қорқытқан ер адам ұсталып, уақытша ұстау изоляторына қамалды. Жетісу облысы полициясы қылмыстық іс қозғады.
Фото: ИА «NewTimes.kz»
Талдықорғанда әйелін ұрып-соғып, көршілеріне қарумен қорқытқан ер адам ұсталды. Жетісу облысы полиция департаменті оқиғаға қатысты түсініктеме берді. Бұған дейін әлеуметтік желілерде ер адамның бір жасар баланың жылауына байланысты жанжал шығарып, жұбайын таңға дейін ұрып-соққаны және көршілеріне қарумен қорқытқаны туралы ақпарат тараған болатын.
Бұл туралы Qazaqtoday.info сайты хабарлайды.
Ведомствоның мәліметінше, қала тұрғынының хабарламасы полицияға 2 қазанда түскен. Әйел күйеуінің денесіне жарақат салып, өлтіремін деп қорқытқанын мәлімдеген.
«Полицейлер дереу оқиға орнына барды. Ер адам ұсталды. Одан пневматикалық қару тәркіленді. Дене жарақатын салу және қорқыту фактілері бойынша қылмыстық істер қозғалды. Күдікті уақытша ұстау изоляторына қамалды», — деді облыстық полиция департаментінің баспасөз қызметі.
Сондай-ақ полиция бұған дейін зардап шеккен әйелден күйеуіне қатысты шағым түспегенін атап өтті. Дәрігерлер тексергеннен кейін әйел баласымен бірге жедел түрде эвакуацияланып, дағдарыс орталығына орналастырылды, онда оларға қажетті психологиялық және әлеуметтік көмек көрсетілді.
Бұған дейін біз Шымкентте ер адамның балаларының көзінше әйелін ұрып-соққаны туралы тағы бір резонансты оқиғаны хабарлаған болатынбыз. Туысының айтуынша, ер адам жұбайының атына 2 млн теңгеге кредит рәсімдеп, оны өлтіремін деп қорқытуын жалғастырып отыр. Зардап шеккен әйелдің туыстары Түркістан облысының полиция департаментінен жағдайды бақылауға алып, оқиғаның мән-жайын анықтауды сұраған.
