Жезқазған саябақтары мас адамдар мен қаңғыбас иттердің жатын орнына айналды

Жезқазғанның демалыс аймақтарында қаңғыбас жануарлармен қатар, түнді мас күйінде өткізіп жүрген азаматтардың көбеюі тұрғындар мен қала қызметкерлерін алаңдатып отыр. Таңғы жұмысқа кіріскен коммуналдық қызмет өкілдері орындықтардан бос бөтелкелерді, шашылған қоқысты және ұйықтап жатқан адамдарды жиі кездестіреді, деп хабарлайды Qazaq Today ақпарат порталы.

Полиция мен мәдениет және демалыс орындарын басқаратын мекемеге түсетін шағымдар соңғы апталарда айтарлықтай көбейген. Тұрғындар саябақтардағы қауіпсіздік деңгейі төмендеп, қоғамдық тәртіптің бұзылуы үйреншікті жағдайға айналып бара жатқанын айтуда.

Мамандардың айтуынша, кешқұрым мас болған азаматтар демалыс орындарында қалып қойып, сол жерде түнейді. Ал ертеңгісін оларды ояту коммуналдық қызметтің күнделікті жұмысына айналып кеткен.

Жергілікті билік қоғамдық тәртіпті реттеу және мұндай оқиғалардың алдын алу үшін қосымша шаралар қабылдануы мүмкін екенін хабарлады.