Мәскеу: Украинаға алыс қашықтықтағы қару жеткізу – қауіпті қадам

РФ Президентінің баспасөз хатшысы Дмитрий Песков Батыс елдерінің Украинаға алысқа ұшатын қару жеткізуге қойылған шектеулерді алып тастауы қауіпті салдарға әкелуі мүмкін екенін мәлімдеді. Бұл туралы ол Кремль журналисі Александр Юнашевке берген сұхбатында айтты, деп хабарлайды Qazaq.today.

«Егер бұл шешімдер шынымен қабылданған болса, олар өте қауіпті. Мұндай шешімдер саяси реттеуге ұмтылысымызға мүлде қайшы келеді», – деді Кремль өкілі.

Ал Мемдума депутаты Виктор Водолацкий Украина Қарулы күштеріне алысқа ұшатын зымырандар жеткізілген жағдайда Ресей «басқа» қару қолданатынын айтты.

«Егер бұл ақпарат рас болып шықса, біздің қалаларымызға соққы жасалмауы үшін біз мүлде басқа қаруды қолданатын боламыз», – деді ол РИА Новости агенттігіне.

26 мамыр, дүйсенбі күні Германия канцлері Фридрих Мерц Германия, Ұлыбритания, Франция және АҚШ Украинаға берілетін қарудың ұшу қашықтығына қатысты шектеулерді алып тастағанын мәлімдеді.

«Енді Украинаға жеткізілетін қарудың ұшу қашықтығына ешқандай шектеу жоқ — не британдықтар жағынан, не француздар, не біз жағынан. Америкалықтар тарапынан да шектеу жоқ», – деді ол.

Мерцтің айтуынша, бұл Украинаға Ресей аумағындағы әскери нысандарға соққы жасау арқылы қорғануға мүмкіндік береді.

«Жақындағанға дейін Украинада ондай мүмкіндік болмаған еді. Енді бар. Бұл — соғыс жүргізу сапасы үшін шешуші маңызға ие», – деді Германия үкіметінің басшысы.