Қытайдың Харбин қаласы АҚШ агенттеріне халықаралық іздеу жариялады

Қытай билігі кибершабуыл ұйымдастыру және құпия ақпараттарды ұрлау фактілері бойынша АҚШ-тың арнайы агенттеріне халықаралық іздеу жариялады. Харбин қалалық Қоғамдық қауіпсіздік басқармасының мәліметінше, күдіктілер – АҚШ Ұлттық қауіпсіздік агенттігінің (NSA) Арнайы ақпараттық операциялар басқармасына тиесілі Кэтерин Уилсон, Роберт Снеллинг және Стивен Джонсон. Бұл туралы Qazaq.today ақпарат агенттігі хабарлайды.

IX қысқы Азия ойындарындағы шабуыл

2025 жылдың 7–14 ақпаны аралығында Қытайдың Харбин қаласында өткен IX қысқы Азия ойындары кезінде ауқымды кибершабуылдар тіркелген. Ресми мәліметтерге сәйкес, сол уақытта Хэйлунцзян провинциясының ақпараттық жүйелері мен Азия ойындарының цифрлық инфрақұрылымдарына шетелден 270 мыңнан астам хакерлік шабуыл жасалған. Оның 63,24%-ы АҚШ тарапынан бағытталғаны дәлелденген.

Қытайдың Синьхуа агенттігі хабарлағандай, бұл шабуылдардың нақты уақыттағы ақпарат алмасу, медиа-трансляциялар, қатысушылардың дербес деректер базасы және инфрақұрылымның қауіпсіздігіне тікелей әсер етуі мүмкін болған. Кибершабуылдардың бір бөлігі Huawei сынды ұлттық маңызы бар компанияларға бағытталған.