Сәтбаевтағы сергелдең: бірнеше күн ереуілдеткен «Қазақмыс» кеншілері келісімге келді

Фото: КазТАГ

«Қазақмыс» корпорациясының «Жезқазғанцветмет» Оңтүстік Қазақстан филиалының №65 кенішінің қызметкерлері ереуілге шыққан еді. Бірнеше күннен кейін басшылықпен жұмысшылар келісімге келіп тарады, деп хабарлайды Qazaq.today. 

Жұмыс беруші тарапынан жан-жақты түсіндіру мен келіссөз жүргізудің нәтижесінде 19 желтоқсан сағат 20:00-дегі жағдай бойынша Саяқ, Жайсаң кеніштері мен Жезқазған мыс қорыту зауытының штаттық режимдегі жұмысы қалпына келтірілді.

— Бұған дейін аты аталған кеніштер мен зауыт жұмысшылары әріптестерін қолдау мақсатында жұмыстарын тоқтатқан болатын, – деп мәлімдеді «Қазақмыс» корпорациясы.

Компания екі күндік ереуіл өзара мәмілемен аяқталды. Жұмыс беруші мен жұмысшылар еңбек жағдайы бойынша ортақ келісімге келді деп отыр.

Еске салсақ, бұған дейін «Қазақмыс» корпорациясының «Жезқазғанцветмет» Оңтүстік Қазақстан филиалының №65 кенішінің қызметкерлері ереуілге шыққан болатын.

250-ден астам кенші алдымен жалақыны 30%, кейін 100% көтеруді, сондай-ақ, мемлекеттік органдар тарапынан қысымды тоқтатуды талап еткен.