Халықаралық іздеуде жүрген Ресей азаматы Алматы әуежайында ұсталды
Көлік полицейлері Алматы әуежайында мемлекетаралық іздеуде жүрген қылмыскерді ұстады, — деп хабарлайды Qazaq.Today тілшісі Polisia.kz сайтына сілтеме жасап .
Көліктегі полиция басқармасы бастығының бірінші орынбасары Мадияр Айтуғанов хабарлағандай, желілік полиция басқармасының қызметкерлері ҰҚК шекара қызметімен бірлесіп, халықаралық іздеуде жүрген 62 жастағы қылмыскерді әуежай залында ұстады.
Ресей Федерациясының азаматы РФ Қылмыстық кодексінің 159-бабы («Алаяқтық») бойынша қылмыс жасағаны үшін іздеуде болған. Ұсталған азамат уақытша ұстау изоляторына қамалды.
«Нелегал-2022» жедел-алдын алу шарасының екі күнінде көлік полициясы Қазақстан аумағында болу ережелерін бұзғаны үшін 38 шетелдікті әкімшілік жауапкершілікке тартқаны атап өтілді.
Көші-қон заңнамасын қасақана бұзғаны үшін алты шетелдік азамат елден шығарылды. Сондай-ақ шақырылған шетелдіктердің белгіленген болу ережелерін бұзғаны үшін Қазақстанның сегіз азаматы да әкімшілік жауапкершілікке тартылды.
