Жетісу облысында 21 адам астан уланып қалды

Жетісу облысы Қабанбай ауылында тойға барған 21 адам астан уланып, ауруханаға түсті.

2023 жылғы 28 тамызда Алакөл аудандық санитариялық-эпидемиологиялық бақылау басқармасына Алакөл аудандық орталық ауруханасынан «Инфекциялық шығу тегі басқа және анықталмаған гастроэнтерит және колит» алдын ала диагнозы қойылған 21 зардап шеккен адамға шұғыл хабарламалар келіп түскен. Бұл туралы Жетісу облысының санитариялық-эпидемиологиялық бақылау департаменті мәлімдеді, деп хабарлайды Qazaq.today.

Барлық зардап шеккендерге алғашқы медициналық көмек көрсетілді. Зардап шеккендердің 11-і жұқпалы аурулар бөліміне жатқызылды, 10-ы ауруханаға жатқызудан бас тартты. Науқастардың жағдайы қанағаттанарлық.

Эпидемиологиялық тергеу басталды. Барлық жағдайлар 2023 жылғы 27 тамызда Қабанбай ауылындағы «Шағала» мейрамханасында өткен үйлену тойында дайын тағамдарды тұтынумен байланысты.

Облыстық және аудандық мүдделі органдарға хаттар жолданды.

Тергеу жүргізілуде, нәтижелер Департаменттің сайтында жарияланады.

Ауруханаға барудың жаңа жағдайлары болған жоқ.

Qazaq.today