Зейнетақы жинағын басқаруға беру: маңызды қадамдар
Зейнетақы жинағын жеке компанияға беру туралы шешім қабылдамас бұрын ИПБ-лардың тізімі мен инвестициялық декларациясын зерделеу маңызды. Сарапшылар кеңесі.
Сурет: Pexels / Towfiqu barbhuiya
Зейнетақы жинағын жеке компанияға сенімгерлік басқаруға беру туралы шешім қабылдамас бұрын, нарықтағы барлық инвестициялық портфельді басқарушы компаниялардың (ИПБ) тізімімен мұқият танысып, олардың инвестициялық декларациясын зерделеу қажет. Бұл құжаттар Бірыңғай жинақтаушы зейнетақы қорының (БЖЗҚ) ресми сайтында орналастырылған.
Бұл туралы Qazaqtoday.info сайты хабарлайды.
ИПБ таңдау – әрбір салымшының дербес шешімі. БЖЗҚ-ның invest.enpf.kz порталында әртүрлі компаниялардың қызмет тиімділігін сипаттайтын негізгі көрсеткіштерді салыстыруға мүмкіндік бар. Экономистердің пікірінше, жинақты сенімгерлік басқаруға беру тиімді болуы мүмкін, себебі қордағы қаражат көбінесе мемлекеттік бағалы қағаздарда сақталады, олардың кірістілігі төмен және инфляциядан асып түспейді.
Дегенмен, жоғары табыс әрқашан жоғары тәуекелмен қатар жүреді. Мысалы, акциялар үлесі жоғары портфельдер үлкен пайда әкеле алады, бірақ нарық құлдыраған кезде жинақ құны уақытша төмендеуі мүмкін. Сондықтан мамандар бір жылдық табыс көрсеткішіне ғана сүйенбей, компанияның инвестициялық стратегиясын, тәуекел деңгейін және тарихи нәтижелерін мұқият талдауды ұсынады.
