Қостанайда еліміздегі ең ірі жабық аквапарк іске қосылды

Сурет: ernur.kz

Қостанай облысының орталығында Қазақстандағы ең үлкен жабық аквапарк техникалық режимде жұмысын бастады. Бұл нысан өңірдің дамып келе жатқан туристік инфрақұрылымының маңызды бөлігіне айналып, ішкі туризмге жаңа серпін бермек, деп хабарлайды Qazaqtoday.info сайты.

Салтанатты шараға облыс әкімі Құмар Ақсақалов қатысты. Ол жаңа кешен заманауи қалалық кеңістіктің ажырамас бөлігіне айналып, тұрғындардың демалыс мүмкіндігін едәуір кеңейтетінін атап өтті. Әкімнің сөзінше, мемлекет басшысы жайлы қала ортасын қалыптастыруға және азаматтардың сапалы демалуына ерекше мән береді. «Біздің міндетіміз – балалар мен жастардан бастап аға буынға дейінгі тұрғындардың өңірден шықпай-ақ бос уақытын сапалы өткізуіне жағдай жасау», – деді Құмар Ақсақалов.

Екі қабатты кешеннің аумағы 9 мың шаршы метрден асады. Ол бір уақытта 500 адамға дейін қабылдай алады. Суық мезгілі ұзаққа созылатын өңір үшін нысанның жыл бойы жұмыс істеуі ерекше маңызға ие. Аквапарк келушілерге 2026 жылғы қыркүйектен бастап есігін ашады.

Кешеннің негізгі бөлігінде жалпы ауданы шамамен 1,5 мың шаршы метрді құрайтын жеті бассейн орналасқан. Олардың ішінде жасанды толқынды бассейн, балаларға арналған аймақ, «Акватоник» және түрлі су аттракциондары бар.

«Осьминог» отбасылық демалыс орны ғана емес, еліміздің түкпір-түкпірінен және көрші мемлекеттерден Қостанайға қонақтар тарта алатын жаңа көрікті орынға айналмақ. Нысан облыс орталығының туристік ұсыныстарының ерекшелігі болуға тиіс.

Туристік инфрақұрылымды дамытумен қатар Қостанайда заманауи әрі жайлы қалалық орта да кезең-кезеңімен қалыптасып келеді. Триатлон паркі, орталық сквер, Ахмет Байтұрсынұлы атындағы университет аумағындағы саябақ жаңа демалыс орындарына айналып жатыр. Саябақтар мен скверлер абаттандырылып, аллеялар, серуендеуге, спортпен шұғылдануға және демалуға арналған аймақтар жасалуда.

Сонымен қатар, Қостанайда заманауи қонақүй инфрақұрылымы да қалыптасуда. Қалада Marriott, Novotel және Holiday Inn сияқты халықаралық брендтердің қонақүй кешендері салынады. Өңір басшысы атап өткендей, іскерлік белсенділіктің артуы мен жаңа инвесторлардың келуі заманауи орналастыру орындарына сұранысты арттырып отыр. Мұндай жобалар жастардың демалуына, қарым-қатынас жасауына және өз мүмкіндіктерін жүзеге асыруына жағдай жасап, өңірде өмір сүру мен жұмыс істеуге қолайлы орта қалыптастырады.

«Экономиканы дамытып, жаңа фабрикалар мен зауыттарды іске қосумен қатар, адамдардың жайлы өмір сүруіне және отбасымен уақытын мазмұнды өткізуіне жағдай жасау қажет. Қостанай облысында тұрғындарға да, өңір қонақтарына да қызықты бірегей нысандар көп болуы керек. Солардың бірі – еліміздегі ең ірі жабық аквапарк», – деді облыс әкімі.

Осы тұрғыдан алғанда, «Осьминогтың» ашылуы бір ғана нысанның іске қосылуымен шектелмейді. Ол Қостанай облысының туристік мүмкіндіктерін толықтырып, өңірге келуге жаңа себеп қалыптастырады және облыс орталығының еліміздің әр аймағынан туристер тартатын орын ретіндегі рөлін күшейтеді.