Астанада кофеханаға кезек полиция тексерісіне ұласты

Сурет: newtimes.kz

Астана тұрғындары әлеуметтік желілерде кофеханалардың бірінің айналасында үлкен кезектердің пайда болғанын көрсететін кадрлармен бөлісуде. Бұл құбылыс акцияға байланысты туындаған. Елордалық полиция қызметкерлерінің мәліметінше, ұйымдастырушыға қатысты шаралар қабылданған, деп хабарлайды Qazaqtoday.info сайты.

Әлеуметтік желілерде кофехана маңында үлкен кезектер түсірілген ондаған фотосуреттер мен бейнежазбалар пайда болды. Келушілер акциялық сусын сатып алу және косметика брендінен сыйлық алу үшін кезекке тұрған.

Астана қалалық полиция департаменті Түркістан көшесінде азаматтардың көп жиналуына байланысты тексеру жүргізілгенін хабарлады.

«Кезек кәсіпкерлер өткізген акция нәтижесінде пайда болғаны анықталды. Қоғамдық тәртіптің бұзылуына жол берілген жоқ. Сонымен қатар, уәкілетті органдар іс-шара ұйымдастырушысына бұқаралық іс-шараларды ұйымдастыру және өткізу тәртібін бұзғаны үшін заңнамаға сәйкес шаралар қабылдады», — делінген ведомство хабарламасында.

Полиция кез келген бұқаралық іс-шара, адамдардың стихиялық жиналуына әкеп соғатын, жергілікті атқарушы органдармен алдын ала келісуді қажет ететінін, басты басымдық азаматтардың қауіпсіздігін қамтамасыз ету екенін еске салды.

Бұған дейін Таразда киім дүкеніндегі жеңілдіктерге байланысты тобыр адамдарды таптап кеткен болатын.