Қазақстандық хоккейші Бұлбұл Қартанбай Канададағы беделді университетке жұмысқа орналасты

Сурет: qaz.ulysmedia.kz

Қазақстандық танымал хоккейші Бұлбұл Қартанбай Солтүстік Америкадағы беделді оқу орнында қызметке орналасқанын әлеуметтік желідегі парақшасында жария етті. Бұл туралы Qazaqtoday.info сайты хабарлайды.

Спортшы өз жазбасында: «Керемет жаңалығымды бөліскім келеді. Солтүстік Америкадағы беделді университеттердің біріне қызметке орналастым! Қазақстаннан шыққан қарапайым хоккейші ретінде мен үшін бұл – алға жасалған үлкен қадам. Бұл – NCAA, USport секілді элиталық университеттік лигаларға және одан да биік деңгейге бастайтын жол», – деп жазды.

Аталған оқу орны – Канаданың Торонто қаласында орналасқан Toronto Metropolitan University (TMU). Бұл ірі мемлекеттік зерттеу университеті бұрын Райерсон университеті деп аталған. 2022 жылы оқу орнының атауы өзгертіліп, қазіргі атауына ие болды. Университет 1948 жылы құрылған, ал білім беру жүйесінде тәжірибеге, инновацияға және студенттердің кәсіби дамуына ерекше мән беріледі.

Бұлбұл Қартанбай Жамбыл облысында дүниеге келген. Ол хоккеймен 13 жасынан бастап айналысқан. 18 жасында Қазақстанның ересектер құрамасында дебют жасаған. Спортшы хоккейден әлем чемпионатының бес турниріне қатысып, «Томирис» және «Айсұлу» командаларының сапында өнер көрсеткен. 2019 жылы ол «Metropolitan Riveters» клубымен келісімшарт жасап, Солтүстік Американың Ұлттық әйелдер хоккей лигасында ойнаған алғашқы қазақстандық атанды. Кәсіби спорттағы мансабын аяқтаған соң, Бұлбұл Қартанбай бапкерлік қызметке ауысқан.