Дариға Назарбаева Forbes тізімінде 20-орынға түсті
Дариға Назарбаева Forbes тізімінде 20-орынға түсті, оның дәулеті 550 млн долларға бағаланды. Динара Құлыбаева 3-орынға көтерілді.
Сурет: dalanews.kz
2026 жылғы ең бай қазақстандықтар рейтингінде Дариға Назарбаева 20-орынға орналасты. Forbes журналы оның дәулетін 550 миллион доллар деп бағалады, деп хабарлайды Qazaqtoday.info сайты.
Былтыр Назарбаева аталмыш тізімде 17-орында еді, ал оның капиталы 571 миллион долларға бағаланған. Яғни, бір жыл ішінде оның байлығы 21 миллион долларға кеміп, рейтингте үш саты төмендеген.
Forbes басылымы дәулеттің азаюына нақты не себеп болғанын түсіндірмеген.
Дариға Назарбаева ұлы Нұралы Әлиевпен бірге «Европа плюс Қазақстан» және «Независимый Телевизионный Канал» компанияларының иесі. Сонымен қатар оның «DLS Group» холдингі арқылы «Регион-Медиа», «Наружная Реклама-Регионы» және «Телефабрика «Дала»» компанияларында үлестері бар.
Ал оның қарындасы Динара Құлыбаева биыл рейтингте үшінші орынға көтерілді. Forbes оның байлығын 5,4 миллиард доллар деп бағалаған. Өткен жылы ол 5,3 миллиард доллар дәулетімен төртінші орында болған.
Динара Құлыбаева жұбайы Тимур Құлыбаевпен бірге «Алмэкс» холдингі арқылы Halyk Bank акцияларының 61,99 пайызына иелік етеді.
