Наска маңындағы ұшақ апаты: 13 адам қаза тапты
Перудегі Наска геоглифтеріне апарған ұшақ апатқа ұшырап, 13 адам қаза тапты. Олардың қатарында Италия, Испания, Германия азаматтары бар.
Сурет: ult.kz
Перудегі Наска геоглифтері маңында шағын ұшақ апатқа ұшырап, салдарынан 13 адам мерт болды, деп хабарлайды Qazaqtoday.info сайты.
Рейтер агенттігі Перу билігіне сілтеме келтіріп, қаза тапқандар арасында Италия, Испания және Германия азаматтары, сондай-ақ экипаждың екі мүшесі бар екенін жеткізді.
Бастапқы дерек бойынша, апатқа ұшыраған «Сессна Карван» әуе кемесі Наска геоглифтерінен шамамен 19 шақырым қашықтықта орналасқан Сокос елді мекені маңына құлаған.
Ұшақ Перудің «Аэродиана» әуе компаниясына тиесілі болған. Бұл әуе кемесі туристерге атақты Наска геоглифтерін аспаннан тамашалауға мүмкіндік беретін экскурсиялық рейстерді орындауға арналған.
Әуеге көтерілгеннен кейін шамамен 50 минут өткен соң экипаж Наска әуежайының диспетчерлік қызметіне төтенше жағдай туралы хабарлаған. Алайда біраз уақыттан соң байланыс толық үзіліп, кейінірек ұшақтың құлағаны расталды.
