Ыстық күндері шөлді басатын ең пайдалы сусын — қарапайым су
Аптап ыстықта ағзаны сусызданудан қорғау үшін қарапайым ауыз су — ең тиімді таңдау. Мамандар тәтті газдалған сусындар мен алкогольден бас тартуға кеңес береді.
Сурет: almaty.tv
Аптап ыстықта ағзаны қызып кетуден және сусызданудан қорғау үшін дұрыс тамақтану мен жеткілікті мөлшерде су ішудің маңызы зор. Сарапшылардың айтуынша, мұндай күндері тәтті газдалған сусындар мен алкогольден бас тартқан дұрыс, деп хабарлайды Qazaqtoday.info сайты.
Дәрігерлердің пікірінше, ыстық күндері шөлді қандырудың ең тиімді нұсқасы – қарапайым ауыз су. Ал тәтті газдалған сусындар мен спиртті ішімдіктер керісінше ағзаны одан әрі сусыздандырып, жүрекке қосымша жүктеме түсіреді.
Жазғы мәзірде құрамында суы мол көкөністер мен жемістерге басымдық берген жөн. Атап айтқанда, қияр, кәді, қарбыз және жидектер ағзадағы сұйықтық қорын толықтыруға септеседі.
Мамандар жеңіл ақуыз көздерін — балық, тауық еті және қышқыл сүт өнімдерін тұтынуды ұсынады. Ал майлы ет, шұжық өнімдері мен фастфудты мәзірден шығарып тастаған тиімді.
Көмірсулардың ішінде қарақұмық, булгур, киноа және қоңыр күріш сияқты жармалар тоқтық сезімін ұзақ сақтап, қандағы қанттың күрт көтерілуіне жол бермейді. Ал тәтті тағамдар мен нан өнімдері, керісінше, шөлдеуді күшейтуі мүмкін.
Ыстықта термен бірге ағзадан калий мен магний де көп шығады. Сондықтан мәзірге банан, жаңғақ, көк шөптер мен авокадоны қосу пайдалы.
Дүниежүзілік денсаулық сақтау ұйымы да аптап ыстық кезінде сұйықтықты жеткілікті ішуді, алкоголь мен қанты жоғары сусындарды шектеуді, жеңіл әрі теңгерімді тамақтануды ұсынады. Осы қарапайым қағидаларды сақтау — ыстықты жеңіл өткізуге және денсаулықты сақтауға көмектеседі.
