88,8 млн теңге жымқырған есепшіге амнистия күші жойылды

Сурет: tengrinews.kz

Атырау облысындағы мемлекеттік мекеменің есепшісі 88,8 миллион теңге бюджет қаражатын жымқырған іс бойынша амнистияның күші жойылды, деп хабарлайды Qazaqtoday.info сайты.

Бас прокуратураның мәліметінше, 2023-2024 жылдар аралығында әйел адам мекеме басшысымен бірігіп, бюджеттен 88,8 миллион теңгеден астам қаражатты иемденіп алған.

Бірінші сатыдағы сот оған 7 жыл бас бостандығынан айыру жазасын тағайындаған. Алайда, кейін амнистияны қолданып, жаза мерзімін 4 жыл 8 айға дейін қысқартқан.

Бас прокуратура амнистияны заңсыз қолданылғанын анықтаған. Заң бойынша, аса ірі мөлшердегі жымқыру үшін жазаны амнистия арқылы қысқарту тек келтірілген залал толық өтелген жағдайда ғана мүмкін. Алайда сотталушы ақшаны толық қайтармаған.

Сонымен қатар, одан 36,8 миллион теңгеден астам соманы өндіріп алу туралы шешім шығарылған. Осыған қарамастан, бірінші сатыдағы сот жазаны үштен біріне қысқартқан, ал апелляциялық саты бұл бұзушылықты жоймаған.

Бас прокуратураның наразылығы бойынша кассациялық сот амнистияны қолдануды күшін жойып, бастапқы жазаны – 7 жыл бас бостандығынан айыруды қалпына келтірген.

Прокуратура амнистияны қолданудың шарты – залалды толық өтеу орындалмаған жағдайда амнистия қолданылмайтынын еске салды.