Иран ИИРКК АҚШ базасы мен Amazon деректер орталығына соққы жасады

Сурет: tengrinews.kz

Иран Ислам революциясы күзет корпусы (ИИРКК) Иорданиядағы АҚШ әскери базасы мен Бахрейндегі Amazon-ның басты деректер орталығына шабуыл жасалғанын, ал бір күн бұрын Сирияның оңтүстігіндегі АҚШ-тың Әт-Танф нысанына зақым келтірілгенін мәлімдеді, деп хабарлайды Qazaqtoday.info сайты.

ИИРКК деректері бойынша, шабуылдар қанатты зымырандармен жасалған. Бұл ақпараттың тәуелсіз растауы жоқ. Бахрейн бірнеше ирандық зымыранды ұстап қалғанын хабарлады, бірақ Тегеранның зақым туралы мәлімдемесіне түсініктеме бермеді. Ал Иорданияда, ирандық тараптың айтуынша, әскери базада ангарда тұрған F-15 жойғыш ұшағы жойылған. Сондай-ақ, ИИРКК күштері әуе шабуылына қарсы қорғаныс жүйесінің радарын дәл көздеген.

Тегеран мәлімдемесінде бұл шабуыл АҚШ-тың Дарховин атом электр станциясына жасаған соңғы әуе соққыларына жауап ретінде жасалғанын айтады. Иран бұл нысанды құрылыс сатысындағы әскери емес объект деп сипаттайды.

АҚШ пен Иран шілде айының басында қарулы қақтығысты қайта бастады. Американдықтар ирандық инфрақұрылымға шабуыл жасап жатса, Тегеран Таяу Шығыстағы АҚШ базаларына соққы беруде. Аймақтық делдалдар АҚШ пен Иранға 10 күндік атысты тоқтатуды ұсынған.

Сонымен қатар, АҚШ президенті Дональд Трамп Иордания мен Иракта үш американ әскери қызметкерінің қазасы үшін Иранды «бірнеше есе төлетуге» уәде берді. Трамп өзінің Truth Social әлеуметтік желісінде бұл туралы тиісті директиваны АҚШ-тың жоғары әскери қолбасшылығына бергенін жазды.