Тоқаевтың Брюссельге сапары: 12 миллиард доллардан астам келісім
Қасым-Жомарт Тоқаевтың Брюссельге сапары қорытындысы бойынша 12 миллиард доллардан астам келісім жасалды. Еуропалық бизнес Қазақстан экономикасына сенім білдірді.
Қазақстан Президенті Қасым-Жомарт Тоқаевтың Еуропалық Одаққа ресми сапары барысында рекордтық сомаға коммерциялық келісімдер мен меморандумдарға қол қойылды, деп хабарлайды Qazaqtoday.info сайты.
Президенттің айтуынша, бұл келісімдер пакеті еуропалық бизнестің Қазақстан экономикасы мен реформаларына деген терең сенімін айқын көрсетеді. Мемлекет басшысы Еуропалық инвестициялық банкпен жемісті әріптестікке ризашылығын білдіріп, жаңа бірлескен жобалар Қазақстанның тұрақты дамуын жеделдетіп, өңірлік байланыстарды нығайтатынын атап өтті.
Еуропалық комиссияның вице-президенті Марош Шефчович Президенттің ағымдағы сапары Қазақстан мен ЕО ынтымақтастығының жаңа бетін ашып, көпжылдық бірлескен күш-жігердің нәтижесі екенін мәлімдеді. Тараптар барлық ауқымды экономикалық бастамаларды жедел іске асыру үшін белсенді диалогты жалғастыруға келісті.
